ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានលើកឡើងថា កម្ពុជាជាម្ចាស់ផ្ទះរៀបចំព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ត្រូវតែធ្វើឱ្យអត្តពលិកបណ្តាប្រទេស នឹកដល់កម្ពុជា ពេលពួកគេវិលត្រឡប់ទៅប្រទេសគេវិញ។
សម្តេចតេជោបានថ្លែងនៅក្នុងពិធីសំណេះសំណាលអត្តពលិកជនមានពិការភាពនារសៀលថ្ងៃទី២៦ ខែឧសភា ឆ្នាំ២០២៣ថា៖ «យើងជាម្ចាស់ផ្ទះ ត្រូវឱ្យគេត្រឡប់ទៅវិញនឹកដល់យើង។ ពេលស៊ីហ្គេមយើងធ្វើបានល្អ ត្រឡប់ទៅវិញគ្មាននរណាជេរយើង ដាក់បណ្តាសាលើយើងថាយើងមិនបម្រើដិតដល់នោះទេ»។
បើតាមសម្តេចតេជោ រដ្ឋាភិបាលកម្ពុជាបានចំណាយថវិកាសម្រាប់រៀបចំព្រឹត្តិការណ៍កីឡាស៊ីហ្គេម និងអាស៊ានប៉ារ៉ាហ្គេម ចំនួន ១១៨លានដុល្លារ គឺបើធៀបនឹងការចំណាយរបស់បណ្តាប្រទេសក្នុងអាស៊ានលើការរៀបចំព្រឹត្តិការណ៍កីឡាកន្លងៗមក គឺកម្ពុជាចំណាយថវិកាតិចជាង។
ព្រឹត្តិការណ៍កីឡាស៊ីហ្គេមដែលកម្ពុជាទើបតែធ្វើជាម្ចាស់ផ្ទះលើកដំបូង បានធ្វើឱ្យពិភពលោកស្គាល់កម្ពុជាកាន់តែច្បាស់ តាមរយៈការមិនយកថ្លៃរាល់ការស្នាក់នៅ ហូបចុក ការផ្សព្វផ្សាយ និងការចូលទស្សនាព្រឹត្តិការណ៍កីឡា ដែលកម្ពុជាជាប្រទេសតែមួយគត់ដែលហ៊ានធ្វើរឿងទាំងអស់នោះ៕
